Policia e Tiranës ka vënë në pranga një person i dyshuar për 8 raste të vjedhjes dhe tentativës për vjedhje automjetesh në qarkun e Tiranës.
Burime nga blutë e kryeqytetit bëjnë me dije se shërbimet e Komisariatit Nr. 4 arrestuan në flagrancë gjatë operacionit policor të koduar “Shupenza”, shtetasin M. O., 39 vjeç, banues në Dibër, i dënuar më parë për veprën penale “Vrasja” e mbetur në tentativë
Gjithashtu, nga kontrollit i servisit të këtij shtetasi, në Shupenzë, Bulqizë, në bashkëpunim me Policinë e Bulqizës, është gjetur dhe sekuestruar një automjet pa targa, i dyshuar në pronësi të shtetasit A. K., i vjedhur nga shtetasi M. O. më datë 16.10.2020, pjesë automjetesh dhe sende që përdorte për të kryer vjedhjet.
“Nga provat e siguruara ka rezultuar se ky shtetas studionte vendet dhe mjetet që vidhte, vepronte në orët e vona të natës, duke krijuar kushte dhe duke ndërprerë ndriçimin elektrik të vendeve ku ishin parkuar këto automjete. Po nga hetimet dyshohet se ky shtetas, makinat e vjedhura i çmontonte për t’i shitur për pjesë këmbimi”, sqaron policia.
Të gjitha automjete që dyshohet se janë grabitur nga 39-vjeçari kanë qenë përreth zonës së Dajtit, konkretisht në rrugën “Shefqet Kuka”, “Muhamet Deliu” dhe “Fadil Deliu”.
