Presidentja e Komisionit Europian, Ursula von der Leyen deklaroi se agresioni i Rusisë në Ukrainë dhe sjellja e saj me ndërkombëtarët përbën kërcënim të madh për rendin botëror.
Deklaratën, von der Leyen e bëri këtë të enjte para gazetarëve pas vizitës në Tokio ku u takua me kryeministrin japonez, Fumio Kishida, shkruan CNN.
“Rusia është sot kërcënimi më i drejtpërdrejtë për rendin botëror me një luftë barbare kundër Ukrainës, paktin e saj shqetësues me Kinën dhe thirrjen e tyre për marrëdhënie të reja dhe shumë arbitrare ndërkombëtare”, tha ajo.
Von der Leyen dhe presidenti i Këshillit të Europës Charles Michel, ndodhen në Tokio për të marrë pjesë në samitin e 28-të BE-Japoni, gjatë të cilit mbështetja për Ukrainën ishte në rendin e ditës.
Në përgjigje të pushtimit rus të Ukrainës, Japonia dhe Bashkimi Europian kanë vendosur një sërë sanksionesh kundër Rusisë, duke përfshirë ngrirjen e aseteve të presidentit Vladimir Putin dhe anëtarëve të familjes së tij.
LEXONI GJITHASHTU
- Nuk ka asnjë plan për të shpallur gjendjen e luftës në Rusi, thotë Kremlini
- Lavrov: Rusia nuk do luftë në Europë, Perëndimi na detyroi
