Votimi i Kodit Zgjedhor, Aleksandër Çipa tregon dy efektet e menjëhershme në sferën politike

Parlamenti i Shqipërisë me 97 vota pro miratoi sot ndryshimet në Kodin e ri Zgjedhor, ndërsa opozita jashtëparlamentare hodhi kritika ndaj kryeministrit Edi Rama se me ndryshimet e njëanshme po bllokon rrugën europiane të Shqipërisë. 

Analisti dhe njëherësh kreu i Unionit të Gazetarëve Shqiptarë, Aleksandër Çipa tha për Euronews Albania se kalimi i kodit shënon një moment të ri politik në vend. Sipas tij, akti i sotëm në Parlament do t’i hapë rrugë zyrtarisht nisjes së fushatës elektorale dhe kthimin e ballafaqimit politik mes Partisë Demokratike dhe asaj Socialiste.

“Kalimi i ndryshimeve kushtetuese, në mënyrë të veçantë i Kodit të ri Zgjedhor krijon një moment të ri politik, duke krijuar dy momente. Së pari fillimin e fushës zyrtare elektorale në vend, dhe së dyti kthimin e balancave të ndeshjes dhe  ballafaqimit politik, midis dy kampeve kryesore, si PD dhe PS-së”, tha ai.

Ai beson se në zgjedhjet e ardhshme do të ketë një pluralizëm partiak më të shtuar në ulëset e Kuvendit të Shqipërisë.

“Pavarësisht nga atakimi që  palët politike po i bëjnë këtij procesi, unë mendoj se në procesin zgjedhor të 25 prillit  të vitit 2021, ne do të kemi padyshim një spektër të pluralizmit partiak më potencial në parlamentin e ardhshëm. Kjo është evidente për dy arsye. Më së pari për shkak të pragut të ulët elektoral. Dhe së dyti, për mënyrën se si po ndryshon metodologjia e procesit të ardhshëm zgjedhor”, tha ai.

Gjithashtu z. Çipa shtoi se me miratimin e Kodit Zgjedhor sot në Parlament u cenuan dy çështjet kryesore të marrëveshjes së 5 qershorit, që ka të bëjë me koalicionet dhe hapjen e listave zgjedhore. Sipas tij, kjo pjesë do të mbajë të ndezur debatin mes opozitës dhe mazhorancës qeverisëse.

“Dy prej çështjeve me të rëndësishme të 5 qershorit, pas kalimit të Kodi Zgjedhor janë cenuar dhe kjo hap debatin mes opozitës dhe mazhorancës”, theksoi Çipa.

Lexoni gjithashtu: 

Parlamenti miraton KQZ-në e re, Ilirjan Celibashi zgjidhet kryetar

Pas debatesh të ashpra, miratohet në parlament Kodi i ri Zgjedhor

Ndryshimet e Kodit Zgjedhor, Rama: Koalicionet s’mund të jenë kope, sot ne do t’i qytetërojmë

Rudina Hajdari bllokon foltoren e Kuvendit: Ndërpriteni këtë seancë të turpshme, po mashtroni shqiptarët siç bëtë 30 vjet

Ndryshimet në kodin zgjedhor, Gjiknuri: Modeli ynë korrigjon çdo anomali, asnjë parti s’meriton fonde publike nëse nuk merr 1 % të votave