Vrasja e nënkomisarit, Sandër Lleshaj: Të mos merremi vetëm me policinë, vrasësi është produkt i shoqërisë

Ish-ministri i Brendshëm Sandër Lleshaj tha në Euronews Albania se diskutimi i madh lidhur me protokollin e ndjekur nga policia gjatë ngjarjes në Lezhë ku humbi jetën një efektiv, është i tepruar.

Ngjarja sipas tij, është finalizim i një historie që ka nisur në bankat e shkollës, ka vijuar në familje e më tej në shoqëri.

“Veç fokusimit tek policia, duhet të ndajmë faktin që krimineli nuk është produkt i policisë, është produkt i një shoqërie që duhet të reflektojë se pse një i ri ngre dorë kundër policisë, pastaj të merremi me defekte të policisë. Pritshmëria e një polici kur përballet me një qytetar nuk është që të vritet prej tij, nuk jemi në atë situatë në Shqipëri. Thelbi është kriminalizimi i rinisë që është futur në një rrugë pa krye”, u shpreh ish-ministri i Brendshëm.

Ish-ministri pranoi se policia ka shumë probleme që duhen përmirësuar, por problemi më i madh, tha ai, është si të ndalojmë kriminalizimin e të rinjve.

Në këtë ngjarje të rëndë, sipas z. Lleshaj janë përgjegjës të gjithë; që nga mësuesit, familja, gjyqësori dhe policia, por kjo e fundit ka nevojë për ndihmën e të gjitha hallkave të mësipërme që të ketë mundësinë të përballet me këtë kriminalizim të shoqërisë

“Policia është hallka fundore dhe punën e policisë ja lehtësojmë kur kujdesemi që në familje e në shkollë, nuk është vetëm policia. Edhe po ta bëjmë më të mirën në botë, nëse nuk merremi në front të gjerë. Ka shumë vërejtje ndaj policisë edhe në këtë ngjarje, por policët janë njerëz jo makina”, tha z. Lleshaj.