Vrasja e oficeres së Gardës Kombëtare, Departamenti i Drejtësisë kërkon dënim me vdekje për autorin

Departamenti amerikan i Drejtësisë tha se do të kërkojë dënimin me vdekje për Rahmanullah Lakanwal i cili dyshohet si autor i të shtënave ndaj dy anëtarëve të Gardës Kombëtare dhe vrasjen e njërit prej tyre, pranë Shtëpisë së Bardhë në nëntor.

Lakanwal, u deklarua i pafajshëm për nëntë akuzat kundër tij – përfshirë vrasje të shkallës së parë – gjatë paraqitjes së tij të parë në gjykatën federale të mërkurën.

Sipas dokumenteve të gjykatës, Lakanwal udhëtoi nga shteti i Uashingtonit për në kryeqytet në fund të nëntorit përpara se t’u bënte pritë dy oficerëve, duke i qëlluar të dy në kokë me armë.

Një tjetër anëtar i Gardës Kombëtare, pasi dëgjoi të shtënat, nxori armën e tij të shërbimit dhe qëlloi Lakanwalin, i cili ra përtokë dhe u arrestua.

Sarah Beckstrom, një nga anëtaret e Gardës Kombëtare që u qëllua në pjesën e prapme të kokës, u shpall e vdekur të nesërmen. Anëtari tjetër, Andrew Wolfe, është ende duke u shëruar.

Lakanwal punoi me CIA-n për më shumë se një dekadë në Afganistan përpara se ushtria amerikane të tërhiqej nga vendi. Ai shkoi në SHBA në vitin 2021.