Vrasja e Pjerin Xhuvanit në Elbasan, 25 të shoqëruar, në kërkim Kelmend Xhaferri

Burime nga policia e Elbasanit thanë për Euronews Albania se autoritetet kanë shoqëruar për të marrë informacione rreth vrasjes së Pjerin Xhuvanit të paktën 25 persona, teksa është shpallur në kërkim Kelmend Xhaferri.

Prej mesditës së djeshme në qytetin e Elbasanit janë vendosur grupe të Forcave të Ndërhyrjes së Shpejtë. Gjatë mbrëmjes janë ushtruar ndërhyrje dhe kontrolle të ndryshme, megjithatë ende nuk ka një informacion zyrtar nëse është bërë e mundur ndalimi i disa prej të dyshuarve që morën pjesë në përplasjen me armë të së mërkurës.

Policia ka shpallur në kërkim Kelmend Xhaferrin, i dyshuar si i përfshirë në ngjarje. Ky njihet edhe me nofkën “Kel Çami”. Ai ka qenë i përfshirë në një përplasje me policinë kur theu një postbllok në vitin 2018 tek Tregu Ushqimor në Elbasan.

Pjerin Xhuvani, 56 vjeç, mbeti i vrarë ditën e djeshme pas një përplasje me armë ku u përfshinë disa persona. Nga përplasja mbetën të plagosur katër të tjerë – Eltjon Bodinaku 32 vjeç, Emiljan Prenga, 39 vjeç, Pavlo Vuksani 50 vjeç – një prej të cilëve punonjësja e policisë Xhensila Sota 27 vjeçe.

Rreth një orë pas përplasjes me armë në polici u dorëzua Arbër Paplekaj, ish-oficer i Repartit të Neutralizimit të Elementëve të Armatosur (RENEA). Sipas informacioneve të rrjedhura për mediat Paplekaj ka ngritur pretendimin se e ka kryer vrasjen në kushtet e vetëmbrojtjes.

Mbrëmjen e së mërkurës në një deklaratë për shtyp, Sekretari i PD-së Gazment Bardhi tha se ngjarja kishte ndodhur si përshkallëzim i një përpjekje për të ndaluar “një rast shit-blerjeje votash” ku përfshihej “një grup kriminal të mbështetura nga PS”. Bardhi tha se struktura e PD-së për “Mbrojtjen e Votës” kishte marrë sinjalizime se një person i quajtur Met Dafllaku po mblidhte karta identiteti dhe po shpërndante para.

Në një reagim për ngjarjen Sekretari i PS-së Balla shprehu shqetësim për “përshkallëzimin e dhunës” duke kërkuar nga autoritetet “zbardhjen sa më shpejt të ngjarjes”. Balla iu shmang komenteve konkrete për të përfshirët në këtë përplasje, por kritikoi ashpër angazhimin e PD-së me të ashtuquajturën strukturë për “Mbrojtjen e Votës” duke e konsideruar “grup paramilitar”.

Pjerin Xhuvani, me profesion mjek psikiatër, njihej në Elbasan pasi ka qenë drejtor i Spitalit Psikiatrik e më pas drejtor i Drejtorisë Rajonale të Fondit të Detyrueshëm të Kujdesit Shëndetësor. Në vitin 2015 qe arrestuar për abuzime me skemën e rimbursimit të ilaçeve.

Ai ka qenë i angazhuar me disa parti politike. Më parë ka qenë funksionar i LSI-së në Elbasan, apo dhe Partisë Drejtësi, Integrim dhe Unitet. Së fundmi nuk ka pasur të dhëna për angazhim specifik me ndonjë forcë politike.

Në përplasjen e 14 marsit mes simpatizantëve të PS-së dhe PD-së Xhuvani qe pikasur në fotografi të denoncuara nga opozita teksa përshëndetej me Sekretarin e Partisë Socialiste Taulant Balla. Përveç Xhuvanit, edhe Xhaferri qe identifikuar si protagonist nga PD-ja në përplasjen e 14 marsit.

LEXONI GJITHASHTU:

• Një i vrarë dhe katër të plagosur në Elbasan, pranga autorit të dyshuar
• Gazment Bardhi shpjegon rrethanat e vrasjes në Elbasan: Autori nuk është shoqërues i imi