Vriten gazetari dhe e mitura, 19-vjeçari i armatosur bën masakër në Florida

Tre persona, mes të cilëve një gazetar dhe një vajzë 9-vjeçare, kanë mbetur të vrarë në Shtetet e Bashkuara, pasi janë qëlluar me armë zjarri në Orlando të Floridës.

Gazetari, i cili punonte për kanalin televiziv “Spectrum News 13”, dhe një kolegu i tij kishin shkuar në një vend ngjarjeje për të raportuar për një grua të gjetur të vrarë në një automjet.

Në atë moment, autori i vrasjes së gruas është shfaqur sërish dhe ka hapur zjarr ndaj tyre, duke lënë të vdekur njërin nga reporterët dhe plagosur tjetrin.

Më pas, i dyshuari, vetëm 19 vjeç, ka hyrë në një shtëpi aty pranë dhe ka qëlluar me armë zjarri një tjetër grua dhe vajzën e saj 9 vjeç. Kjo e fundit humbi menjëherë jetën, ndërsa e ëma ndodhet në spital në gjendje kritike për jetën.

Televizioni “Spectrum News 13” i identifikoi gazetarët si 24-vjeçarin Dylan Lyons, viktima dhe Jesse Walden, i plagosuri.

Ndërkohë, i dyshuari rezulton shtetasi amerikan Keith Moses, i cili pas arrestimit ka refuzuar të bashkëpunojë me hetuesit.