Vuçiç flet për “luftë mes elefantëve”: Serbia s’do të përsërisë gabimet me fuqitë e mëdha

Presidenti i Serbisë, Aleksandër Vuçiç thotë se, në javët e ardhshme Serbia do të përballet me një situatë të vështirë, që nis që me takimin me përfaqësuesin e posaçëm të BE-së për dialogun Serbi-Kosovë, Miroslav Lajçak.

Vuçiç iu referua vizitës në Moskë dhe takimit në Shtëpinë e Bardhë në kuadër të dialogut Kosovë-Serbi. Por, përveç këtyre ai thotë se, pas këtyre  takimeve do të ketë takime edhe më të rëndësishme, duke shtuar se do të përpiqet të mbrojë interesin kombëtar të Serbisë.

“Kam biseduar dje me Putinin, patëm një diskutim të gjatë. Një ditë pas zgjedhjeve, Lajçak do të vijë në Beograd. Një ditë pas kësaj, do të shkoj në Moskë. Dy ditë pas kësaj, duhet të biem dakord për delegacionin që do të shkojë në Uashington. Pak ditë më vonë, mendoj se do të ketë disa takime edhe më të rëndësishme, për të cilat nuk mund të flas dot tani, pasi kështu na është thënë”, është shprehur Vuçiç.

Presidenti serb ka nënvizuar se, mbetet për t’u parë nëse shqiptarët do t’i binden kërkesës së përfaqësuesit të Presidentit amerikan, Richard Grenell. “Mos harroni se Thaçi nuk ka dashur ta pranojë kurrë. Për 4 vjet e kam kërkuar një gjë të tillë, por për 4 vjet ai këmbënguli sepse ka pasur gjithmonë një fushatë të tmerrshme kundër nesh. Për 4 vjet ata nuk e pranuan dhe tani papritur jemi informuar se, kanë rëndë dakord. Të shohim”, tha Vuçiç gjatë inaugurimit të një fabrike.

Ai ka shtuar se, ka një konflikt të madh mes SHBA dhe Gjermanisë, por sipas tij është e rëndësishme që Serbia të ndjekë një politikë të zgjuar ndryshe siç ka bërë më parë në marrëdhënien me fuqitë e mëdha.

“Pa marrë parasysh se si do të përfundojë, është e rëndësishme që ne të mbetemi të pa dëmtuar në luftën e elefantëve. Ne nuk do të luftojmë me Gjermaninë dhe Amerikën. Po luhet një lojë e madhe mes lojtarëve të mëdhenj në komunitetin ndërkombëtar, për të cilët ne dhe shqiptarët jemi shumë të vegjël. Nga ana tjetër, shqiptarët po merren me lojërat e tyre të brendshme”, nënvizoi Vuçiç duke shtuar se Serbia nuk do të largohet nga negociatat.