Vuçiç pret vaksinat kineze dhe falënderon Pekinin: Do forcojmë marrëdhëniet

Presidenti serb Aleksandar Vuçiç vlerësoi maksimalisht Kinën për pajisjen e Serbisë me 1 milion doza vaksinë anti-COVID.

Vuçiç ishte në aeroportin ndërkombëtar të Beogradit për të pritur stokun e parë të vaksinave nga grupi kinez “Sinopharm”.

Në një intervistë për një televizion kinez, kreu i shtetit serb theksoi se 1 milion doza vaksina mund të shpëtojnë shumë jetë.

Ai nënvizoi se nuk është aspak e lehtë të sigurosh vaksina, sidomos në një kohë kur situata e epidemisë është ende serioze.

“Ne jemi një nga vendet që nuk kemi frikë të mburremi për marrëdhënien tonë të fortë me Kinën. Nuk e fshehim këtë. Jam krenar dhe do të investoj më shumë kohë dhe përpjekje për të përmirësuar marrëdhënien tonë me lidershipin dhe popullin kinez,” – tha presidenti Vuçiç.

Duke folur më vonë në një konferencë shtypi, ambasadorja kineze në Beograd, Chen Bo tha se shpreson që vaksinat kineze të ndihmojnë Serbinë ta vërë pandeminë nën kontroll.

Deri tani, qeveria serbe ka blerë tre lloje vaksinash anti-COVID, atë nga “Pfizer”, rusen “Sputnik” dhe kinezen “Sinopharm”.