Vuçiç takon këshilltarin e Scholz, fokusi te dialogu me Kosovën

Presidenti serb, Aleksandër Vuçiç u takua këtë të premte me të dërguarin special të qeverisë gjermane për Ballkanin Perëndimor, Manuel Sarrazin për të diskutuar mbi vazhdimin e dialogut Beograd-Prishtinë dhe situatën aktuale në rajon.

Ata kanë diskutuar për rëndësinë e vazhdimit të dialogut, si dhe për rëndësinë e përgatitjes për takime në kuadër të Procesit të Berlinit.

Vuçiç përsëriti qëndrimin për të gjitha çështjet në Ballkanin Perëndimor, duke theksuar se Serbia po avokon avancimin e mëtejshëm të lidhjes dhe bashkëpunimit ekonomik në rajon, shkruan Tanjug.

Ai gjithashtu vuri në dukje se Serbia po vazhdon një politikë të një qasjeje të përgjegjshme ndaj të gjitha çështjeve rajonale, si mënyra më e mirë për ruajtjen e stabilitetit dhe përparimit në të gjithë rajonin.

Më 18 shkurt të këtij viti, Qeveria gjermane ka emëruar Sarrazin-in si të dërguar të posaçëm për Ballkanin Perëndimor. Ai është zyrtari i parë gjerman që mban një pozitë të tillë në Qeverinë gjermane.

Dialogu mes Kosovës dhe Serbisë, me ndërmjetësim të Bashkimit Evropian, ka nisur më 2011.

LEXONI GJITHASHTU

• Lajçak takon këshilltarin e Scholz: Diskutuam për ecurinë e dialogut Kosovë-Serbi
• Rama: “Ballkani i Hapur” do të ndihmojë në dialogun Kosovë-Serbi
• “Miku im’, Rama takon Lajçak në SHBA për ecurinë e dialogut Kosovë-Serbi