Zaev: Në Shkup po fryn sot një erë e re e bashkimit rajonal

“Në Shkup po fryn sot një erë e re e bashkimit rajonal,” me këto fjalë e çeli kryeministri i RMV, Zoran Zaev fjalën e tij në Forumin Ekonomik të Shkupit, i cili ka bërë bashkë liderët e Shqipërisë, Maqedonisë së Veriut dhe Serbisë.

Forumi, i cili synon shtimin e bashkëpunimit rajonal në sferën ekonomike përmes masave lehtësuese u ndoq gjithashtu nga 350 kompani të vendeve pjesëmarrëse.

“Ky është një mesazh i fuqishëm që Ballkani po krijon në nivel të lartë një kuptim se ndërlidhja ekonomike dhe krijimi i një hapësire ekonomike vitale ballkanike është një ambicie e përbashkët,” u shpreh Zaev.

Kryeministri maqedonas shtoi se përpjekjet gëzojnë mbështetjen e plotë të liderëve Vuçiç dhe Rama.

Sipas Zaev, vetëm me një rajon të ndërlidhur dhe të integruar mund të lëvizet më tej drejt integrimit europian.

Qëllimi kryesor është të mos kemi ndalje të qytetarëve përkatës në kufi; të përgatiten politikat për lëvizje të lirë të shërbimeve përmes njohjes së përbashkët të kualifikimeve dhe nënshkrimeve elektronike; të sigurohet lëvizja e lirë e studentëve, ekspertëve dhe biznesmenëve; të lehtësohet lëvizja e kapitalit për një treg financar të lirë.

Pritet që liderët të nënshkruajnë një marrëveshje dhe dy memorandume bashkëpunimi.

LEXONI GJITHASHTU:

• Rama, Vuçiç dhe Zaev mblidhen për ekonominë e Ballkanit, asnjë ftesë për Kosovën, Bosnjën dhe Malin e Zi
• Në 2023 nuk do të ketë kufij mes Shqipërisë-RMV-Serbisë, thotë Vuçiç
• Rama nga Shkupi: Bashkimi rajonal na afron më shumë me BE