Zakharova kundër evropianëve: Përdorën akuzat për helmimin e Navalny-t për të lënë në hije dosjen Epstein

Rusia po kërkon që vendet evropiane të paraqesin prova specifike për akuzat e tyre për helmimin e kritikut të Kremlinit, Alexei Navalny, me toksinë bretkosash. Zëdhënësja e Ministrisë së Jashtme ruse, Maria Zakharova u shpreh se kjo deklaratë ka ardhur për të lënë në hije dosjen e Epstein.

“Të gjitha akuzat kundër Rusisë ishin të llojit ‘shumë të mundshme’. Nuk kishte detaje specifike. Ishte thjesht një deklaratë që do të ishte ngjarja hapëse e Konferencës së Sigurisë së Mynihut dhe do të linte në hije dosjet e Epsteinit”, tha Zakharova në një konferencë për shtyp me gazetarët të mërkurën.

Britania, Franca, Gjermania, Suedia dhe Holanda njoftuan të shtunën se analizat e mostrave nga trupi i Navalny-t konfirmuan praninë e epibatidinës, një toksinë që gjendet në bretkosat helmuese të Amerikës së Jugut e cila nuk gjendet natyrshëm në Rusi. Sipas tyre, Moska kishte mjetet, motivin dhe mundësinë për t’i administruar helmin Navalny.