Zbulime arkeologjike ne Libi pas përmbytjeve, pritet restaurimi i tyre

Pas përmbytjeve shkatërruese që përfshinë Libinë, disa monumente arkeologjike kanë dalë në dritë. Ato janë zbuluar nga autoritetet libiane që inspektuan qytetin e lashtë grek pranë Dernas.

“Pasi situata të normalizohet pas kësaj katastrofe që shkaktoi humbje njerëzish, duhet t’i kushtojmë vëmendje edhe sitit arkeologjik dhe duhet të formohet një komitet kombëtar, i përbërë nga ekspertë, në mënyrë që këto monumente arkeologjike të saposhfaqura të klasifikohen, dhe të hartohet një plan për rehabilitimin e vendit. Kjo duhet të ndodhë sa me shpejt të jetë e mundur, jo vetëm brenda zonës kryesore të Kirenesë, por kudo ku janë shfaqur monumente arkeologjike,” tha Drejtori i Departamentit të Arkeologjisë, Ahmed Issa.

Qyteti i Kirenesë u ndërtua në vitin 631 p.e.s. nga grekët, dhe arriti kulmin e tij në shekullin e katërt p.e.s. me zhvillimin e veprimtarisë bujqësore dhe tregtisë.

Qyteti dallohet nga banjat e tij greke, Tempulli i Zeusit, i cili u themelua në shekullin e pestë para Krishtit, Tempulli i Apolonisë dhe të tjerë.

Pas përmbytjeve më shumë se 11,000 njerëz u raportuan të vdekur, ndërtesat dhe urat e rrugëve u shkatërruan, veçanërisht në qytetin e Dernas.

LEXONI GJITHASHTU:

• Mbi 40 mijë të shpërngulur për shkak të përmbytjeve në Libi
• OKB: Libia rrezikon të përballet me shpërthimin e ndonjë sëmundjeje