Zbulimi i 18 bazave të armatimit, GJKKO lë në burg të arrestuarit e operacionit ‘Kompleks’

Gjykata e Posaçme la në burg të arrestuarit gjatë operacionit ku i zbuluan 18 baza armatimi dhe u zbardhën 3 ngjarje kriminale.

Konkretisht mbetën në burg: Blendi Deda, Flor Abazi, Paris Prenga, Petrit Shera, Algert Hysa, Bujar Jupi, Festim Mustafa, Arben Sufa dhe Klodian Kulla. Seanca e sotme u zhvillua me dyer të mbyllura, ndërsa prova më e fortë e SPAK është dëshmia e Enver Jamakut.

Tri ditë më parë Policia e Shtetit finalizoi në Tiranë operacionin e koduar “Kompleks”, ku goditën 18 baza që shërbenin për modifikimin, magazinimin dhe furnizimin me armë të grupeve kriminale në territorin e të gjithë vendit.

Policia njofton se në pranga ranë 5 persona dhe u shpallën në kërkim dy të tjerë.

Gjatë operacionit “Kompleks” janë ndaluar Paris Prenga, Bledar Deda Flor Abazi, Bujar Jaupi dhe Arben Sufa, si dhe janë shpallur në kërkim Sokol Gjura dhe Akil Kulla.

Ndërkohë janë sekuestruar arsenal armësh luftarake të llojeve të ndryshme snajper, antitanke, kallashnikovë, pistoleta, silenciatorë, radio policie e ushtrie, optikë termikë për snajper, pjesë të ndryshme për modifikimin e armëve luftarake e sasi municionesh luftarake.

Po kështu janë sekuestruar edhe 7 automjete, 2 prej tyre të blinduara.