Zbulohen 2 lokale ku viheshin baste sportive, arrestohet 1 pronar, tjetri në kërkim

2 lokale të tjera ku viheshin baste sportive, janë zbuluar në Fier në Kuadër të operacionit “Sundimi i ligjit”.

Policia bën me dije se është arrestuar pronari i njërit prej lokaleve ndërsa po punohet për kapjen e pronarit të lokalit tjetër. Gjithashtu janë proceduar penalisht 2 shtetas që u kapën duke vënë baste.

Gjatë kontrolleve, policia ka sekuestruar 5 televizorë, 2 celularë, 2 laptopë, 1 tablet, 1 monitor, 1 skaner dhe 1 printer për bileta, 19 bileta bastesh, si dhe rreth 30 000 lekë që i shërbenin kësaj veprimtarie të kundërligjshme.

Njoftimi i policisë:

Specialistët për Hetimin e Krimeve të Komisariatit të Policisë Fier, nga kontrollet e vazhdueshme në ambiente të ndryshme, të kryera me qëllim goditjen e rasteve të organizimit të kundërligjshëm të lojërave të fatit, kanë konstatuar se në 2 lokale, në fshatin Shën Pjetër dhe në lagjen “Kastriot”, Fier, viheshin baste sportive.

Në përfundim të veprimeve procedurale për këto raste, u arrestua në flagrancë pronari i lokalit në fshatin Shën Pjetër, shtetasi O. Ll., 38 vjeç, u shpall në kërkim pronari i lokalit tjetër, shtetasi E. J., 33 vjeç, si dhe u proceduan në gjendje të lirë, pasi u kapën teksa vinin baste sportive në këto lokale, shtetasit S. F., 42 vjeç dhe K. M., 26 vjeç.

Punohet për kapjen e 33-vjeçarit.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.

LEXONI GJITHASHTU:

• Vrasja me thikë e të riut në Fier, policia arreston dhe një 17-vjeçar
• Operacioni “Furnitori”, arrestohet një 35- vjeçar shiste lëndë narotike në 1 lokal