Zbulohet një laborator kriptomonedhash në zonën e Krujës

Policia e Shtetit ka zbuluar një laborator kriptomonedhash gjatë kontrollit në disa magazina në zonën e Krujës, përmes një aksioni të koduar “Kriptomonedha”.

Policia bën të ditur se është proceduar penalisht pronari i ambientit që ia kishte lëshuar me qira një personi tjetër, teksa po vijon puna për identifikimin dhe kapjen e personit që kishte ndërtuar laboratorin, si dhe të personave të tjerë të përfshirë në këtë veprimtari kriminale.

“Si rezultat, në katin e parë të një objekti në pronësi të shtetasit S. D., i cili ia kishte lëshuar këtë ambient me qira një personi tjetër, shërbimet e Policisë konstatuan një laborator që shërbente për prodhimin e kriptomonedhave. Në cilësinë e provës materiale u sekuestruan 7 pajisje elektronike për prodhimin e kriptomonedhave. Gjithashtu, në këtë banesë u konstatua lidhje e paligjshme e energjisë elektrike”, thuhet në njoftimin e Policisë.

Materialet e sekuestruara i kaluan Prokurorisë së Rrethit Gjyqësor Krujë, për veprime të mëtejshme.

Monedha virtuale është një formë e parregulluar e parave dixhitale, e pa emetuar dhe e pa garantuar nga një bankë qendrore, e cila mund të veprojë si mjet pagese.

Kriptomonedha ka filluar të tërheqë edhe investitorë shqiptarë, ndërsa Banka e Shqipërisë dhe autoriteti i mbikëqyrjes financiare bëjnë me dije se nuk ekziston asnjë subjekt financiar i licencuar për tregtimin e monedhave virtuale.

LEXONI GJITHASHTU:

• Tregu i monedhave virtuale, eksperti: Kujdes me investimet në kriptovalutë
• Kosova pritet të lejojë përdorimin e kriptovalutave brenda vitit