Zelensky i dërgon letër Putinit, i kërkon takim ballë për ballë për t’i dhënë fund luftës

Presidenti Volodymyr Zelensky ka bërë thirrje për një takim ballë për ballë midis tij dhe Vladimir Putinit në një përpjekje të re për t’i dhënë fund luftës.

Në një letër të hapur drejtuar presidentit rus, udhëheqësi ukrainas tha se do të ishte “gabim të pritej thjesht” derisa lufta në Evropë të bëhej përsëri në qendër të vëmendjes së SHBA-së, duke shtuar se paqja mund të vinte vetëm “përmes angazhimit të drejtpërdrejtë midis” Ukrainës dhe Rusisë.

Ai gjithashtu bëri thirrje për një armëpushim të plotë për kohëzgjatjen e negociatave të propozuara, diçka që Putin e përjashtoi më herët të enjten.

Presidenti i SHBA-së, Donald Trump, tha të enjten se mendonte se “do të ishte shumë mirë” nëse të dy udhëheqësit do të takoheshin.

Kremlini konfirmoi se e kishte marrë letrën dhe se Putini do të informohej për të. Zelensky deklaroi se “pas 26 vitesh në pushtet, mosha po fillon të ndikojë” te Putini.

“Ukraina propozon përfundimin e kësaj lufte përmes një angazhimi të drejtpërdrejtë midis nesh dhe jush. Unë po propozoj një takim”, shkroi Zelensky.

Ndërkohë, kjo nuk është një ofertë e re nga udhëheqësi i Ukrainës.

Siç ka bërë edhe më parë, Kremlini u përgjigj, duke thënë se Zelensky ishte i mirëpritur të takohej me Putinin në Moskë.

Ajo që binte në sy ishte pranimi publik i Kievit se SHBA-të “janë plotësisht të përqendruara në çështjen e Iranit”.

“Do të ishte gabim të prisnim thjesht derisa lufta në Evropë të rikthehej në qendër të vëmendjes së saj”, shkroi Zelensky.

Duke folur me gazetarë të huaj në Shën Petersburg, Putin tha se ishte “sigurisht i përgatitur dhe i gatshëm të arrinte një marrëveshje me Ukrainën”, por tha se duheshin bërë kompromise. Putin këmbëngul se Rusia po fiton luftën dhe Ukraina duhet të dorëzojë territorin.

Putini sugjeroi që, meqenëse Trump ishte i zënë me Iranin, BE-ja mund ta bindte Zelensky-n të dorëzonte territorin.

Qëndrimi i hershëm i Putinit ka qenë që Ukraina duhet të tërhiqet nga katër rajone të pushtuara kryesisht nga Rusia – Donetsk, Luhansk, Kherson dhe Zaporizhzhia – dhe të heqë dorë nga përpjekjet e saj për t’u bashkuar me NATO-n.

Ukraina ka përjashtuar mundësinë e lëshimit të territorit, duke thënë se kjo do ta inkurajonte Rusinë të pushtonte përsëri, siç kishte bërë në vitin 2022 kur nisi luftën e saj në shkallë të plotë tetë vjet pasi aneksoi ilegalisht Krimenë.

Negociatat për armëpushim kanë ngecur në muajt e fundit, dhe bisedimet e mëparshme të paqes në Gjenevë, Abu Dhabi dhe Stamboll kanë dështuar.

Në letrën, e cila është më shumë se 1,800 fjalë e gjatë, Zelensky tha: “Nuk është sikur ne në Ukrainë jemi të shqetësuar për fatin e ushtarëve rusë pas gjithçkaje që lufta juaj i ka sjellë vendit tonë. Por mua më interesojnë ukrainasit. Po humbasim njerëzit tanë dhe çdo humbje është e dhimbshme për ne.”

Zelensky tha se negociatat ballë për ballë mund të zhvillohen në një vend si Zvicra ose Turqia.

Ministri i Jashtëm ukrainas, Andriy Sybiha, tha se “kjo letër e hapur është një propozim serioz dhe kuptimplotë për t’i dhënë fund luftës”.

“Ne presim një përgjigje kuptimplote ndaj këtij propozimi. Është koha për t’i dhënë fund kësaj lufte. Është koha për të zgjedhur paqen”, shtoi ai.

Letra e presidentit ukrainas erdhi në të njëjtën ditë që Putini ishte në Shën Petersburg, ku po zhvillohet një forum i madh ekonomik.

Një ditë më parë, Kievi kishte nisur një sulm me dron në periferi të qytetit, një sulm i përmendur në mesazhin e Zelensky-t si “një vizitë”.

Autoritetet e mbështetura nga Rusia në Krimenë e pushtuar fajësuan Ukrainën për vdekjen e katër personave në sulmet ndaj kryeqytetit rajonal, Simferopol. Ukraina tha se kishte goditur një depo karburanti.

Gjatë konferencës së tij për shtyp të enjten, Putin duket se hodhi menjëherë dyshime nëse një takim apo marrëveshje mund të zhvillohej ndonjëherë.

Megjithatë, zgjedhjet janë pezulluar në Ukrainë që kur u shpall gjendja e jashtëzakonshme pas pushtimit të Rusisë.

Trump tha se mendonte që SHBA-të kishin luajtur një rol të rëndësishëm në afrimin e paqes midis dy vendeve.

“Mendoj se do të ishte shumë mirë nëse do të takoheshin. Duhet ta bëjnë. Përfundojeni,” tha ai.

I pyetur për kompromiset që do të duhej të bënin të dyja palët, ai tha se “preferonte të mos thoshte”.

“Dua që secili prej tyre të bëjë kompromise të caktuara dhe mendoj se do ta bëjnë këtë”, shtoi ai.