Zelensky njofton nga Davos: Nesër takim tripalësh SHBA-Ukrainë-Rusi për paqen

Një takim trepalësh midis zyrtarëve amerikanë, ukrainas dhe rusë do të mbahet në Emiratet e Bashkuara Arabe (EBA) nga e premtja, tha të enjten Presidenti ukrainas Volodymyr Zelensky, një shenjë e intensifikimit të bisedimeve të paqes për t’i dhënë fund luftës në Ukrainë.

Takimi dyditor do të zhvillohet të premten dhe të shtunën, tha udhëheqësi ukrainas ndërsa mbajti një fjalim në Forumin Ekonomik Botëror në Davos.

Zelensky kritikoi ashpër mosveprimin evropian në Forumin Ekonomik Botëror të enjten, duke deklaruar se kontinenti “duket i humbur” dhe mbetet i bllokuar në përsëritjen e pafundme të dështimit për të mbrojtur veten ose për të mbështetur vendosmërisht Ukrainën.

“Të gjithë e kujtojnë filmin e madh amerikan “Groundhog Day”, por askush nuk do të donte të jetonte kështu”, tha Zelensky. “Duke përsëritur të njëjtën gjë për javë të tëra, muaj dhe sigurisht, vite. E megjithatë, kjo është pikërisht mënyra se si jetojmë tani.”

Udhëheqësi ukrainas shprehu zhgënjim me reagimin e Evropës ndaj krizës rreth Groenlandës, duke vënë në pikëpyetje vendosjen e kontingjenteve të vogla trupash në territorin e Arktikut.