Zgjedhjet në kohë pandemie mund të rrisin numrin e të prekurve, apelohet për vaksinim

Numri i të shtruarve me COVID-19 në spitalet e Kosovës gjatë muajit janar ka shënuar një rënie të ndjeshme. Megjithatë Drejtori i Shërbimit Spitalor Klinik Universitar, Valbon Krasniqi, thotë se zgjedhjet e jashtëzakonshme të 14 shkurtit mund të ndikojnë në rritjen e rasteve pozitive me coronavirus.

Krasniqi tha se nga institucionet kërkohet që qytetarët të vijojnë të respektojnë masat anti-Covid, mirëpo me zhvillimin e procesit zgjedhor kjo gjë mund të mos ndodhë njësoj si më parë.

Sipas Krasniqit menaxhimi i pandemisë mund të arrihet vetëm përmes vaksinimit të përgjithshëm të popullatës. Ai tha se autoritetet shëndetësore po presin ardhjen e vaksianve dhe nisjen sa më parë të programit të vaksinimit.

Gjatë 24 orëve të fundit në Kosovë janë raportuar 353 persona me COVID-19 ndërsa 5 qytetarë kanë humbur jetën, duke e çuar në 1410 numrin e viktimave në total.