Zgjedhjet në Kosovë, Miftaraj: Hera e parë që Kosova përjeton demokracinë parlamentare

Ehat Miftaraj, drejtor ekzekutiv i “Instituti i Kosovës për Drejtësi” në një intervistë për Euronews Albania tha se zgjedhjet e parakohshme në Kosovë janë zgjidhja e duhur për rregullimin e situatës.

Vendimi që është publikuar deri më tani nga Gjykata Kushtetuese shpreh qartë se çdo kush që është i dënuar në tre vitet e fundit me një vendim të formës së prerë i kufizohet e drejta për të kandiduar në zgjedhjet e përgjithshme, sqaroi Miftaraj.

Sipas tij që nga shpallja e Pavarësisë, Kosova është duke përjetuar për herë të parë Demokracinë Parlamentare dhe ndaj ishte i mendimin se këto zgjedhje do i japin zgjidhje situatës së ngatërruar politike, në Kosovë.

“Përderisa nga viti 2008 e deri më tani kemi pasur lider të fuqishëm politik të cilët jo vetëm që kanë kontrolluar partinë e tyre por edhe partitë e tjera. Kemi pasur figura të fuqishme që mbi Kushtetutën, mbi partitë politike, mbi parimet bazë që përbëjnë një demokraci parlamentare në Kosovë kanë arritur në një farë mënyre, në mënyrë të lehtë të zgjedhin Presidentin e më pas ka munguar ajo qeverisja e bazuar në integritet,” – tha Miftaraj.

Në këndvështrimin e tij Kosova ka nevojë të ndërtojë një kulturë të re institucionale duke marrë parasysh dhe krizat e shumta që ka kaluar.