Zgjedhjet në Kosovë, mijëra aplikime nga diaspora

Në Komisionin Qendror të Zgjedhjeve, deri të martën në mesditë, për zgjedhjet e 14 shkurtit, emailat e 68 mijë shqiptarëve të Kosovës që jetojnë jashtë vendit, ende nuk janë hapur. Por, rezultati i punës për verifikimin e tyre, nga 13 janari, është si vijon: 14.307 aplikime janë futur në sistem, 13.138 aplikime janë me zotësi juridike10.172 aplikime janë aprovuar 2.426 aplikime kanë nevojë për dokumente shtesë.

Një nga këta zyrtarë të KQZ-së që bën verifikimin përmes telefonatave, duke pyetur aplikuesit për emrin, mbiemrin, numrin personal dhe vendin ku jeton, është edhe Pranvera Pllana.

“Shumica e aplikantëve përgjigjen. Ka edhe që nuk përgjigjen por shumica përgjigjen. Po ka disa që gëzohen shumë, që e mirëpresin, ka edhe të tjerë që janë të zënë në punë, varet nga njerëzit”, thotë Pranvera Pllana, telefonuese nga KQZ.

Kosova po e kryen për herë të parë këtë proces të verifikimit të votuesve potencial nga diaspora. Procesi u kritikua jo pak, aq sa duhej edhe vendim i Gjykatës Supreme. Për vështirësitë foli edhe kryetarja e KQZ-së.

“Unë kritikat i shoh nganjëherë edhe dashakeqe sepse një proces i komplikuar i cili duhet të kryhet nga KQZ-ja, është duke u kritikuar pa të drejtë. Ne jemi duke bërë të pamundurën që të gjithë qytetarëve të Republikës së Kosovës me të drejtë vote, t’ia japim mundësinë që të votojë”, thotë Valdete Daka, kryetare e KQZ-së.

Afati për aplikim të votuesve nga jashtë vendi përfundon të enjten në mesditë, por procesi i verifikimit të tyre përmes telefonatave do të vazhdojë deri në fund të muajit.