Zgjedhjet në Kosovë, të mërkurën përfundon afati për verifikimin e kandidatëve për deputetë

Komisioni Qendror i Zgjedhjeve (KQZ) zyrtarisht u është drejtuar gjashtë institucioneve për verifikimin e kandidatëve për deputetë.

Ato janë Këshilli Gjyqësor i Kosovës, Paneli Zgjedhor për Ankesa dhe Parashtresa, ministria e Punëve të Brendshme, Agjencia e Kosovës për Inteligjencë, ministria e Jashtme dhe ministria e Mbrojtjes.

“Që në afatin më të shkurtër por jo më vonë se 20 janar 2021, në orën 12:00, të na përgjigjen në kërkesat tona për verifikim”, u shpreh Valmir Elezi, zëdhënës i KQZ-së.

Bazuar në verifikimin e këtyre institucioneve, KQZ-ja ka kërkuar nga Paneli Zgjedhor për Ankesa dhe Parashtresa t’i dërgojë emrat e personave nga lista e kandidatëve nëse janë subjekt i vendimit për t’iu hequr e drejta për të qenë kandidat.

“KQZ-ja do të veprojë në përputhje me aktgjykimin e Gjykatës Kushtetuese si dhe ligjit për zgjedhjet e përgjithshme”, u shpreh ai më tej.

Sipas aktgjykimit të Kushtetueses me të cilin u rrëzua qeveria Hoti, një i dënuar me më shumë se 1 vit burg, nuk mund të garojë për deputet në afat prej tre vjetësh.

Një nga personat e dënuar e që garon, është edhe Albin Kurti, kryetar i Vetëvendosjes.

Lexoni gjithashtu:

Zgjedhjet në Kosovë, Jeta Krasniqi: Lufta është më e ashpër mes partive politike, do ketë ‘beteja’ deri më 14 shkurt

Koalicionet e munguara të 14 shkurtit, të mëdhenj dhe të vegjël presin rezultatet për të bashkëpunuar