Në një intervistë për Euronews Albania, Vendenis Lahu, kandidat për deputet i Lëvizjes Vetëvendosje tregoi se ajo që e shtyu për t’u bërë pjesë e procesit zgjedhor në këto zgjedhje të jashtëzakonshme gjendja e Kosovës, më konkretisht gjendja e rinisë në Kosovë.

“Lista e Vetëvendosjes në këto zgjedhje është listë për referendum popullor,” – tha kandidati për deputet i LVV-së, teksa theksoi se në këto zgjedhje do përplaset politika e kaluar 20 vjeçare me politikën e mirë.

Ai sqaroi se nuk mëton që në një kohë të shkurtër të ndryshojë gjendjen e krijuar në Kosovë ama sipas tij ajo që mund të ndihmojë është ndryshimi i politikave shtetërore.

“Janë 20 vite të pasluftës ku nuk është arritur që rinia as të përfaqësohet dhe as të adresohen problemet e saj. Kjo është një nga shkaqet kryesore se përse unë vendosa që këtë herë të jem pjesë e garës zgjedhore,” – u shpreh Lahu.

Vendenis Lahu tregoi se të rinjtë e kanë humbur besimin te politika në Kosovë por beson se Lëvizja Vetëvendosje do ta ndryshojë këtë gjë.

Lexoni gjithashtu: 

Vjosa Osmani u bashkua me LVV-në, Alma Lama: LDK nuk ndikohet nga individë të caktuar