Dy ditë para zgjedhjeve, Cakaj apel shqiptarëve të Luginës: Silluni me vetëdije kombëtare

Ministri në detyrë për Evropën dhe Punët e Jashtme të Shqipërisë, Gent Cakaj, ka shprehur mbështetje kundrejt partive politike shqiptare, që janë pjesë e listës së Luginës së Bashkuar.

Me një postim në faqen e tij zyrtare “Facebook”, Cakaj  thotë se në zgjedhjet e së dielës në Serbi, me rëndësi është fakti që partitë shqiptare, të dinë të ruajnë një unitet të brendshëm dhe të përfaqësojnë të drejtat e shqiptarëve.

“Më tepër se kurdo herë tjetër, ruajtja e frymës së bashkëpunimit ndër-partiak e unitetit të brendshëm politik është e rëndësisë së patjetërsueshme në Luginën e Preshevës dhe jo vetëm’, shkruan Cakaj.

Ai shton faktin se, pavarësisht se ekzistojnë shumë parti shqiptare, në Luginën e Preshevës duhet të ketë vetëm një faktor politik shqiptar, me platformë të unifikuar, në shërbim të mbrojtjes e lartësimit të të drejtave të tyre kombëtare.

“Ndaj, ju lutem: mbështetja masive dhe e fuqishme e listës së Luginës së Bashkuar është skajshmërisht e rëndësishme nga të gjithë pa asnjë dallim. Kësaj radhe, sjellja e përgjegjshme politike e vetëdija e lartë kombëtare duhet të mbizotërojnë llogaritë e ngushta partiake”, shton ai.

Në fund të shënimit të tij, ministri shqiptar, Gent Cakaj jep këtë porosi: “Ndaj, kësaj radhe me fort përgjegjësi politike: të gjithë në mbështetje të listës së Luginës së Bashkuar.”, sqaron ai.