Zgjedhjet, shtyhet afati i vlefshmërisë së kartave që skadojnë brenda 25 prillit

Kartat e identitetit dhe pasaportat biometrike, të cilat skadojnë para datës 25 prilli do të jenë të vlefshme deri më datë 30 të këtij muaji.

Ky vendim është marrë ditën e djeshme, në mbledhjen e Këshillit të Ministrave me qëllim, që qytetarëve të mos u mohohet e drejta për të zgjedhur.

“Afati i vlefshmërisë së letërnjoftimit elektronik të shtetasve shqiptarë, që përfundon deri në datën 25 prill 2021, zgjatet deri në datën 30 prill 2021”, thuhet në VKM.

Ministria e Brendshme pak ditë më parë publikoi listën përfundimtare, ku saktësohet se 3,588,869 qytetarë kanë të drejtë vote për të zgjedhur emrat e politikanëve, të cilët do t’i përfaqësojnë në legjislaturën e re.