Zgjidhet situata e ujësjellësit në Vlorë, ish-drejtori liron zyrën pas shkarkimit

Merr fund pas disa ditësh kontestime çështja e drejtimit të ndërmarrjes së Ujësjellës Kanalizimet Vlorë. Posti i drejtorit i është kaluar Elona Hodaj ndërsa Shkëlqim Leskaj, i shkarkuar pak ditë më parë, ka liruar zyrën.

Edhe sot pranë zyrave të UKV-së u vu re prezenca e punonjësve të policisë bashkliake, por siç mësohet nga Euronews Albania ndërhyrja e tyre ka qenë e panevojshme.

Prej pasdites së të martës ish-drejtori Leskaj ka bërë dorëzimet në Qendrën Kombëtare të Biznesit, çka i hapi rrugën regjistrimit të drejtores së re Elona Hodaj. Leskaj njëherit ka dorëzuar zyrën dhe vulat sipas protokollit.

Vetëm një ditë më parë ish-drejtori Leskaj shpërndau për mediat një deklaratë ku konfirmonte se ai ishte në detyrë sipas të gjithë tagrit që i atribuohej sipas legjislacionit në fuqi. Por ky ishte një sqarim për mediat mëngjesin e së martës. Ndërsa pasdite duket se ish-drejtori u dorëzua.

Sot edhe pse emëruar ditë më parë, ka mundur të futet në zyrë e të nisë punën drejtorja Elona Hodaj.

LEXONI GJITHASHTU:

• Bashkia Vlorë thotë se e ka shkarkuar, drejtori i ujësjellësit vijon punën