Nis aktiviteti në aeroportin e Rinasit, nuk ka ende kontrollorë shqiptar të kthyer në punë

Gazetari i Euronews Albania, Merin Maçi tha se situata në aeroportin e Rinasit është më e qetë se dy ditë më parë.

Pyetur nga gazetarja Mulaj, referuar deklaratës së kryeministrit, nëse disa nga kontrollorët shqiptar që bojkotuan punën do të kthehen në detyrë, Merin Maçi u shpreh se nga informacionet që Euronews Albania ka siguruar apo nga vëzhgimi që kanë bërë në aeroport, asnjë nga kontrollorët nuk është kthyer.

Ndërkaq, avioni i parë ka mbërritur nga Brukseli dhe gati për nisje po bëhet dhe avioni për Bolonja, siç raportoi dhe gazetari. Vendi për monitorimin e fluturimeve aktualisht i është lënë kontrollorëve nga Turqia dhe Greqia të cilët do të jenë në krye të detyrës, në aeroportin e vetëm shqiptar, atë të Rinasit.

Pas rreth 30 orësh krizë, situata u zhbllokua në aeroportin “Nënë Tereza”, me mbërritjen e avionit që solli 100 mijë dozat e radhës të vaksinës kineze Sinovac.

Ndërkohë, dje, të gjithë pasagjerët që kishin prenotuar biletën për në Dubai, udhëtuan me autobusë deri në Podgoricë, për të fluturuar nga aeroporti i kryeqytetit të Malit të Zi.

Lexoni gjithashtu:

Nesër rinisin fluturimet komerciale në Rinas, TIA zbardh oraret

Balluku: Sot nisin fluturimet esenciale nga aeroporti i Rinasit