Zhvillimet në Kosovë, Hashim Thaçi dënon arrestimin e përfaqësuesve të OVL-UÇK-së

Presidenti i Kosovës, Hashim Thaçi, ka reaguar pas arrestimeve të bëra sot nga EULEX-i. Me një deklaratë për mediat, kreu i shtetit thekson se asnjë i pandehur potencial nuk do t’i shpëtojë drejtësisë, dhe për këtë shton ai, nuk kishte asnjë arsye për të kryer aksione spektakolare në zyrat e OVL-UÇK-së.

“Asnjë i pandehur potencial nuk do t’i ikë drejtësisë. Prandaj, vlerësoj se nuk ka asnjë arsye për ekspedita apo aksione spektakolare. Ndërsa integriteti dhe dinjiteti i secilit qytetar duhet të respektohet”,  shton ai.

Ai pohon se shteti i Kosovës ka qenë, është, dhe do të vijojë të mbetet në anën e të vërtetës.

“E tërë bota e dinë se Kosova ishte viktimë. UÇK-ja dhe tërë populli i Kosovës janë përballur me gjenocid dhe spastrim etnik. Kosova gjithmonë ka qenë dhe do të jetë në anën e të vërtetës, bashkëpunimit, drejtësisë dhe të drejtës ndërkombëtare, e përcaktuar për ndërtimin e shtetit demokratik, ligjor dhe shumetnik, atdhe të të gjithë qytetarëve të saj”, tha ai.

Për presidentin e Kosovës, rrjedhja e dokumenteve sekrete ka cenuar legjitimitetin e gjykatës në sytë e qytetarëve. Gjithashtu, z. Thaçi nuk harron t’u dalë në mbrojtje veteranëve të Ushtrisë Çlirimtare të Kosovës, ndërsa thotë se asnjë “grackë” e hedhur nuk do mundet dot ta pozicionojë shtetin e Kosovës në anën e kundërt të drejtësisë .

“E theksoj se rrjedhja e dokumenteve ka cenuar legjitimitetin e gjykatës në sytë e qytetarëve, ka dëmtuar imazhin e shtetit të Kosovës dhe të drejtat e të pandehurve potencialë. Publikimi i këtyre dokumenteve ka qenë i papranueshëm. Veteranët e UÇK-së janë vlera më sublime e rezistencës dhe lëvizjes sonë për liri e pavarësi. Asnjë grackë e ngrehur nga kushdo nuk do ta vendosë Kosovën në anën e kundërt të drejtësisë’, shton më tek kreu i shtetit.

Mëngjesin e ditës së sotme, njësia e EULEX-it arrestoi kreun e Organizatës së Veteranëve të Luftës së Ushtrisë Çlirimtare të Kosovës, Hysni Gucatin, ndërsa Policia e Kosovës pasdite ndaloi edhe nënkryetarin e saj, Nasim Haradinaj.

Reagimin e plotë të presidentit Thaçi e gjeni duke klikuar këtu.

Lexoni gjithashtu: 

Policia e Kosovës ndalon nënkryetarin e OVL-UÇK-së Nasim Haradinaj

Nasim Haradinaj: Do publikojmë në media CD-të që janë paralajmëruar të vijnë pranë zyrave të OVL-UÇK

​Tensionohet situata në Kosovë, qytetarët bllokojnë rrugën dhe gjuajnë me shishe pjesëtarët e EULEX

EULEX arreston kreun e veteranëve të UÇK

Hysni Gucati: Do të bindim opinionin publik se Gjykata Speciale bashkëpunon me Serbinë

Gjykata Speciale konfirmon arrestimin e ish-zyrtarit të FSK, Salih Mustafa