Zjarri në Tiranë, Arben Cara: Flakët janë nën kontroll, puna vijon për shuarjen e të gjitha vatrave

Drejtori i zjarrfikësve, Arben Cara, ka folur lidhur me zjarrin që përfshiu një pallat në Tiranë, duke deklaruar se forcat e Policisë së Shtetit dhe shërbimet zjarrfikëse janë angazhuar masivisht për vënien nën kontroll të flakëve.

Sipas tij, situata është aktualisht e stabilizuar, por puna vijon në terren për shuarjen e plotë të zjarrit dhe lokalizimin e vatrave brenda banesave.

“Jemi angazhuar masivisht me forcat e Policisë së Shtetit dhe forcat civile, me të gjitha kapacitetet që kemi për të bërë të mundur lokalizimin e flakëve, të cilat tashmë i kemi nën kontroll.

Është ende shumë herët për të thënë që zjarri është fikur, pasi po punohet në të gjitha drejtimet për të lokalizuar vatrat e zjarrit që ndodhen brenda banesave.

Tirana është e angazhuar e gjitha me të gjitha kapacitetet e saj. Mbi 50 zjarrfikës janë nga Bashkia e Tiranës, kemi zjarrfikës nga Vora dhe Kamza, si dhe zjarrfikës të ushtrisë.

Pasi kemi marrë nga salla e drejtorisë lajmin për zjarrin, unë kam komunikuar drejtpërdrejt me drejtorin e Policisë së Shtetit dhe Ministrinë e Brendshme”, u shpreh ai.