Zjarri rrezikon banesat e fshatit në Gjirokastër, ndërhyjnë zjarrfikësit

Një vatër zjarri ka përfshirë një sipërfaqe kullote në rrethinat e fshatit Arshi Lengo, Gjirokastër ndërsa është dashur ndërhyrja e zjarrfikësve për lokalizimin dhe vendosjen nën kontroll të flakëve.

Zjarri është shfaqur rreth orës 11.00 në fshatin Arshi Lengo, në një sipërfaqe me barëra e shkurre, shumë pranë banesave.

Në vendngjarje mbërritën dy automjete zjarrfikëse me grupet e efektivëve.

“Ndërhymë në dy drejtime fillimisht duke larguar rrezikun nga ana e banesave dhe më pas për mospërhapjen e zjarrit në një sipërfaqe të gjerë”, pohon drejtuesi i Shërbimit Zjarrfikës, Gramoz Llapi.

Nga ndërhyrja e shpejtë dhe efikase e zjarrfikësve të mbështetur nga banorët zjarri u vu nën kontroll dhe po vijon operacioni deri në shuarjen e plotë të tij.