Zv.kancelari gjerman: Mungesa e gazit mund të shkaktojë krizë ekonomike

Zëvendës kancelari gjerman, njëherësh Ministri i Ekonomisë, Robert Habeck paralajmëroi këtë të hënë se mungesa e gazit gjatë dimrit në Evropë mund të shkaktojë krizë të rëndë ekonomike.

Sipas, Habeck kjo duhet të shmanget me çdo kusht, shkruan CNN.

“Gjatë dimrit, ekziston një kërcënim ku reduktimet e gazit në fakt duhet të imponohen. Sipas mendimit tim, kjo do të çonte në një krizë të rëndë ekonomike në Evropë dhe në Gjermani. Duhet të shmanget me çdo kusht”, u shpreh Habeck.

Habeck nënvizoi se Evropa nuk ndodhet ende në atë situatë, por për të mos arritur deri aty, duhet një veprim vendimtar, i përbashkët dhe mbi të gjitha shumë i shpejtë.

Pak ditë më parë, Gjermania aktivizoi fazën e dytë të planit të saj të emergjencës për furnizimet me gaz natyror, duke thënë se vendi përballet me një “krizë” dhe duke paralajmëruar se objektivat e magazinimit për dimër janë në rrezik për shkak të pakësimit të dërgesave nga Rusia.

Qeveria tha se vendimi për të ngritur nivelin e alarmit pason reduktimet  në dërgesat ruse të bëra që nga 14 qershori dhe vazhdimin e çmimit të lartë të tregut për gazin.

LEXONI GJITHASHTU

• Gjermania aktivizon fazën e dytë të planit për furnizimin me gaz
• Gjermania njofton masa të reja për të ulur varësinë nga gazi rus
• Gazprom përcakton rregullat, mesazh liderëve të BE-së