Zëvendësministrja Rakacolli për Euronews Albania: S’ka urdhër për mbylljen e spitalit COVID-4

Zëvendësministrja e Shëndetësisë Mira Rakacolli tha për Euronews Albania se pavarësisht rënies së numrit të të shtruarve me COVID-19 në spitale, nuk ka asnjë urdhër për mbyllje të spitaleve.

Aktualisht në Shqipëri janë hapur shtatë spitale për trajtimin e pacientëve me COVID-19, ku katër prej tyre janë në Tiranë dhe tre janë spitale rajonale. Ditën e mërkurë ministria raportoi se në shtatë spitalet ishin të shtruar 247 pacientë, një numër rreth dy herë më i vogël se ai i periudhës shkurt-mars ku të shtruarit në një ditë shkuan deri në 662.

Përballë raportimeve në media se “Spitali COVID-4 është mbyllur”, Euronews Albania pyeti zëvendësministren e Shëndetësisë, e cila mohoi të ketë një urdhër për mbyllje të spitaleve.

“Spitali COVID-4 nuk është mbyllur, ka rënë në mënyrë të ndjeshme numri i shtrimeve, por spitalet hapen dhe mbyllen me urdhra dhe nuk ka asnjë urdhër të mbylljes së COVID-4,” – sqaroi Rakacolli.

Nisur nga mbërritja e dozave të tjera të vaksinave ditën e djeshme, Rakacolli tha se politika kryesore e vaksinimit lidhet me grupmoshat dhe grupet e rrezikut.

“Ne do të vazhdojmë me mbarimin e grupmoshave mbi 70 vjeç dhe besoj që javën tjetër do të ulet grupmosha,” – tha zv. ministrja.

Ndërkaq sa i takon imunitetit të tufës, ajo theksoi se kjo ndodh kur arrin imunitetin mbi 70% e popullsisë gjë që për momentin nuk është duke ndodhur në Shqipëri.

Masat kufizuese nuk do të kenë asnjë lloj lehtësimi dhe të gjitha vendimet e reja do të merren në varësi të numrit të të infektuarve, sqaroi Rakacolli.

LEXONI GJITHASHTU: 

• Mira Rakacolli: Vaksina kineze parandalon 100% vdekjen nga COVID-19