Zyrtare, dorëhiqet drejtori i Policisë së Shtetit

Drejtori i Përgjithshëm i Policisë, Ardi Veliu është dorëhequr nga detyra.  Ardiu Veliu mori këtë detyrë të rëndësishme në 5 shkurt të 2018, pas shkarkimit të Haki Çakos si Drejtori i Përgjithshëm i Policisë.

Kryeministri i vendit, Edi Rama publikoi letrën e dorëheqjes së Ardi Veliut, ndërsa e falënderoi për kontributin e dhënë gjatë kohës, që ishte në drejtimin e Policisë së Shtetit. Ai shkroi në “Twitter” se Veliu ka shumë për t’i dhënë vendit në detyra të tjera.

“Me konsideratën më të lartë për ndershmërinë, profesionalizmin dhe përkushtimin e posaçëm të Drejtorit të Përgjithshëm të Policisë së Shtetit, Ardi Veliu, dhe me bindjen se ai ka akoma shumë për t’i dhënë shtetit në detyra të tjera, e falënderoj nga zemra për kontributin e vyer”, shkruan Rama.

Në letrën e dorëheqjes, dërguar kryeministrit Rama, z. Veliu thotë se këtë vendim e ka marrë për t’iu përkushtuar më shumë familjes së tij.

Ai shkruan më tej se: “jam përpjekur të jap më të mirën time dhe të forcave tona policore duke menaxhuar situata komplekse kundër trafiqeve të drogës, krimit të organizuar dhe atij në rrugë”

Me konsideratën më të lartë për ndershmërinë, profesionalizmin dhe përkushtimin e posaçëm të Drejtorit të Përgjithshëm të Policisë së Shtetit, Ardi Veliu, dhe me bindjen se ai ka akoma shumë për t’i dhënë shtetit në detyra të tjera, e falenderoj nga zemra për kontributin e vyer. pic.twitter.com/C7dCbHvulC

— Edi Rama (@ediramaal) October 5, 2021

Kush është Ardi Veliu?

Në vitin 1993 Ardi Veliu mbaroi studimet në Akademinë Ushtarake “Skënderbej”, në Tiranë. Më pas, ai kreu studimet në Akademinë e Policisë në Tiranë si dhe në 1998 përfundoi studimet në Akademinë e Policisë në Ankara.

Krahas këtyre studimeve, Veliu është diplomuar dhe për menaxhim biznesni, studime të cilat i kreu në vitet 2003-2007 në Vlorë. Po kështu, ai është diplomuar për juridik.

Gjatë karrierës së tij ai ka mbajtur një sërë poste të rëndësishme si: Shefi i sektorit të Rendit në Vlorë; Shefi i komisariatit të Policisë Durrës; Zëvendësdrejtor për Sigurinë në Drejtorinë e Policisë Tiranë; Drejtor i Policisë Rrugore në Drejtorinë e Policisë së Shtetit, si dhe Drejtor i Drejtorisë Vendore të Policisë Tiranë.

LEXONI GJITHASHTU: 

• PD: Ardi Veliu ka qenë çdo ditë në shërbim të grupeve kriminale