100 kg kokainë| Operacion me 17 të arrestuar në 6 shtete të BE, të gjithë nga Vlora

Një operacion ndërkombëtar u zhvillua ditën e martë në 6 shtete, kundër një organizate shqiptare të trafikimit të lëndëve narkotike.

Sipas mediave të huaja, ky operacion u shtri në Belgjikë, Francë, Holandë, Gjermani, Itali dhe Austri dhe çoi në arrestimin e 17 personave.

Referuar burimeve policore, një prej të arrestuarve, i konsideruar trafikant i rrezikshëm, është kapur nga policia e Ravennës në Faenza.

Bëhet fjalë për një 42 vjeçar shqiptar. Edhe dy persona të tjerë janë arritur të kapen në Toskanë. Sipas burimeve, 11 prej të arrestuarve janë kapur në Belgjikë, 3 në Itali dhe 3 të tjerë në shtetet e tjera europiane ku u shtrinë kontrollet me qëllim ekstradimin në Belgjikë.

Sipas hetimeve, anëtarët e organizatës kanë lidhje familjare me njëri-tjetrin dhe të gjithë vijnë nga Vlora.

Bëhet fjalë për një lloj mafie shqiptare, siç thonë mediat italiane, që merret me gjithçka që lidhet me kokainën, nga importi tek prerja, tek riciklimi dhe më në fund tek trafiku i armëve.

Ndër veprimet që i atribuohen organizatës, ka edhe episode të dhunshme të lidhura me kriminelë të përshkruar nga prokurorët belgë si veçanërisht të rrezikshëm dhe të vendosur.

Emrat e të dyshuarve nuk janë aspak të panjohur organet ligjzbatuese. Në vitin 2014, krerët e bandës ishin dënuar tashmë me burgim nga 10 deri në 12 vjet, ndërsa të tjerët me role të vogla kishin marrë dënime nga 3 deri në 7 vjet. Por edhe kështu ata nuk u dekurajuan dhe përkundrazi vazhduan rrugën e tyre kriminale.

Kërkimet në kuadër të operacionit kanë çuar në kapjen e 100 kg drogë të llojit kokainë dhe amfetaminë, armë zjarri, kimikate, jelek antiplumb dhe 265,000 euro para cash.

Grupi i trafikantëve të hetuar nga Policia e Antwerp në Belgjikë ishin të specializuar në shpërndarjen e sasive të mëdha të drogës që më pas transportoheshin në vende të ndryshme me mjete të pajisura me hapësira të fshehta. Hetimi nga policia gjyqësore ka të bëjë me një organizatë që mësohet se ishte aktive në importin e kokainës nga Amerika e Jugut dhe pastrimin e parave nga trafiku i kokainës.

Në Belgjikë u bënë 12 kërkime në Antëerp, Schoten dhe Sint-Niklaas. Ato u kryen në bashkëpunim midis policisë gjyqësore federale dhe policisë lokale në Antwerp.

LEXONI GJITHASHTU:

• Pse u bashkuan 7 bandat? Softa: Droga, pronat dhe lojërat e fatit krijuan aleancat
• “Kam kaluar njerëz kontrabandë në Itali”, skafisti i Vlorës: Kur nisi droga e lashë