“150 mijë pazari i fundit”/SPAK mbyll hetimet për 2 të akuzuar për shitblerje votash

SPAK ka mbyllur hetimet për Kristo Agalliun dhe Agron Duraj të cilët akuzohen për shitblerje votash në zgjedhjet e 14 majit.

Gjykata e Posaçme ka dhënë masën e sigurisë “arrest shtëpie” për Agalliun, i akuzuar për “korrupsion aktiv në zgjedhje”, ndërsa Duraj që po fliste në telefon me Agalliun është proceduar në gjendje të lirë.

Euronews Albania siguroi videon ku shihet 61-vjeçari Duraj teksa komunikon në telefon me shtetasin Kristo Agalliu.

“100 mijë lekë është turp. Ja marrim por është turp 100 mijë lekë. Ti 2 vota ke, unë kam 4 vota. Po mirë unë kam makinë vetë, ç’e dua makinën atje. Të më hedhë karburantin ai. E ul pazarin nga e keqja. 100 mijë lekë dhe 50 mijë lekë naftë. Pazari i fundit”, dëgjohet teksa thotë Duraj.

Njoftimi:  

Në përfundim të hetimeve paraprake të procedimit penal nr.96 të vitit 2023, Prokuroria e Posaçme Kundër Korrupsionit dhe Krimit të Organizuar ka paraqitur para Gjykatës së Posaçme të Shkallës së Parë Për Korrupsionin dhe Krimin e Organizuar (në datën 27.09.2023) kërkesën për gjykim në ngarkim të pandehurve:

1. Kristo Agalliu, akuzuar për veprën penale të “Korrupsioni aktiv në zgjedhje”, parashikuar nga neni 328 i Kodit Penal.
   2. Agron Duraj, akuzuar për veprën penale të “Korrupsioni pasiv në zgjedhje”, parashikuar nga neni 328/b i Kodit Penal.

Nga hetimi i këtij procedimi penal ka rezultuar se, në datën 09 Maj 2023, i pandehuri Kristo Agalliu i ka ofruar shuma monetare të pandehurit Agron Duraj për të ndikuar në vullnetin e këtij të fundit, në mënyrë që të votojë një kandidat të caktuar në Zgjedhjet për Organet e Qeverisjes Vendore, që janë zhvilluar datën 14 Maj 2023.

LEXONI GJITHASHTU:

• I ngarkuar me punë i SHBA takon Altin Dumanin: SPAK po bën përparim mbresëlënës
• KLP hap garën, 3 vende bosh për prokuror pranë SPAK