203 aplikime tek ‘Deputeti që duam’, Muzhaqi: Interes nga profesionistë e të rinj

203 persona kanë aplikuar në platformën ‘Deputeti që duam’ të ngritur në Partinë Socialiste.

Faza e parë e aplikimeve përmbyllet më 30 shtator dhe synimi është që një pjesë prej tyre të përfshihen në listat e kësaj force politike në zgjedhjet e parlamentare të vitit të ardhshëm.

Fundi i shtatorit do të përmbyll fazën e parë, atë të aplikimit në platformën ‘Deputeti që duam’ të ngritur në partinë socialiste.

Në një intervistë për Euronews Albania, drejtuesja e platformës, Ministrja e Shtetit për Rininë dhe Fëmijët, Bora Muzhaqi tregon mbi interesin që kanë patur kandidatët potencialë për të qenë në listat për deputet në parlamentaret e 2025-ës.

“Deri tani ne kemi diku tek 203 aplikime që kanë ardhur. Aplikimet kanë qenë për të gjitha kategoritë që ne kemi përzgjedhur, pra për diasporën, për rininë, për profesionistët, për gratë por edhe tek platforma tjetër që ka qenë e hapur pra deputeti që duam për shqipërinë. Interesi më i lartë ka qenë nga profesionistët dhe nga rinia,”-tha ministrja.

Duke filluar nga java tjetër, aspirantët për deputet do të kenë testin e parë me elektoratin.

“I kemi dhënë detyrë aplikantëve që ata të fillojnë të fillojnë dhe të angazhohen me takime drejtëpërdrejtë në terren. Pra të bëjnë disa takime me komunitetin e tyre, pra nëse je profesionist mund të bësh një grupim profesionistësh dhe të kuptosh se kush janë sfidat që ky sektor ka,”-u shpreh më tej Muzhaqi.

Kjo është hera e dytë që socialistët tentojnë të afrojnë në parti individë të fushave të ndryshme për t’i bërë pjesë të listave për deputet.

Në 25 prill të 2021-it nga kjo platformë u përfshin mbi 12 persona për një vend në parlament. A synohet që këtë radhë të ketë më tepër të kandidatë?

“Besoj edhe nga numrat e aplikimeve që kemi deri tani mund të jetë një shifër që besoj do të jemi rreth asaj por kjo është dicka që sërish nuk dua ta them tani sepse e para nuk dua të demotivojë të gjithë ata që po aplikojmë sepse mendoj që ky numër mund të jetë edhe më i lartë,” –përfundoi ministrja.

LEXONI GJITHASHTU:

• Deputeti gjerman paralajmëron: Fluks refugjatësh në BE nëse nuk mbështetet Ukraina 
• Nesër ditë zie për PD, 1 minutë heshtje në nderim të ish-deputetit Gerti Bogdani