4 shokë me jet ski në det, 2 mjetet përplasen/Njëri nga adoleshentët rëndë në spital

Një 16-vjeçar ka mbetur i plagosur rëndë dhe një 17-vjeçar ka pasur dëmtime të lehta pasi bashkë me dy shokë të tjerë 17-vjeçarë, u futën në det me dy jet ski.

Gjatë manovrave në det, dyshohet se aksidentalisht dy mjetet lundruese janë përplasur me njëra – tjetrën dhe për pasojë janë dëmtuar drejtuesi i njërit mjet Jet Ski, shtetasi K. Xh. dhe pasagjeri, shtetasi D. K.

Për 17-vjeçarin që drejtonte mjetin tjetër lundrues ka nisur një procedim penal dhe mbi të rëndon akuza “Plagosja e rëndë nga pakujdesia”.

Fillimisht, shtetasit U. K. dhe R. P., si pasojë e tronditjes, kanë dhënë dëshmi të rreme duke thënë se dy shokët e tyre u dëmtuan pasi u hodhën nga shkëmbi në det, por më pas, gjatë hetimeve, kanë deklaruar të vërteten.

Procedimi penal ka nisur edhe për shtetasin R. P., 56 vjeç, pronari i mjeteve lundruese Jet Ski, për veprën penale “Shkelja e rregullave teknike në punë”.

Gjithashtu, operatorit turistik me administrator shtetasin R. P., nga ana e Drejtorisë Vendore për Kufirin dhe Migracionin Vlorë i janë bllokuar menjëherë të gjitha mjetet lundruese Jet Ski.

LEXONI GJITHASHTU:

• Iu fik jet ski gjatë natës, shpëtohet pas 10 orësh në det i riu
• Bllokohen 2 Jet Ski dhe 5 varka në Shkodër, nuk plotësonin kushtet e sigurisë