“4000 vende të lira në arsimin profesional”, Rama: Duhet infrastrukturë për më shumë

Një reformë e ndërlikuar, por jetike për shoqërinë dhe zhvillimin e saj. Kështu e ka përshkruar kryeministri Edi Rama sistemin e arsimit profesional në Shqipëri.

Ai zhvilloi një takim me nxënës dhe drejtorë të zyrave arsimore ku theksoi se në këtë fazë të zhvillimit të vendit, prindërit duhet të kenë besim se kur e çojnë fëmijën në një shkollë profesionale ai do të marrë arsimin e duhur.

Për më tepër, Rama sqaroi se nëse aktualisht ka 4 mijë vende të lira, aq duhet të jetë dhe “thithja” e nxënësve, përndryshe duhet zhvilluar infrastruktura e nevojshme për të pritur më shumë.

“Është e rëndësishme të kuptohet që ne sot kemi mundësi ta adresojmë këtë situatë me më shumë agresivitet për shkak të faktit që kemi investuar në mënyrë të arsyeshme, ndoshta patjetër që duhet më shumë dhe më shumë do të bëjmë, por aktualisht nëse i nxisim dhe i shtyjmë nxënësit që në numra të konsiderueshëm të integrohen në sistemin e arsimit profesional e bëjmë pa merakun që do shkojnë në shkolla ku pastaj nuk do të mund të marrin arsimin e nevojshëm,” – u shpreh kryeministri.

“Nëse sot kemi rreth 4 mijë vende të lira në sistemin e arsimit profesional, ne duhet të thithim 4 mijë nxënës. Nevojat janë për shumë më tepër por nuk mund t’ju themi juve të shtyni shumë më tepër sepse do na duhet të kemi infrastrukturën për shumë më tepër,” – shtoi Rama.

Çdo nxënës i gjimnazeve që do t’i transferojë studimet në arsimin profesional mund ta bëjë këtë brenda 3 muajve nga nisja e vitit shkollor.

LEXONI GJITHASHTU:

• Hallulli: Rama ka bërë vëlla Abazoviçin, ka harruar Albin Kurtin
• Rama shtron drekë për liderët shqiptarë të rajonit, e pranishme Osmani dhe Begaj