“Arrest me burg” vendosi sot Gjykata e Durrësit për Elidon Çelën, që u kap në port me 522 mijë euro të padeklaruara dhe mallra kontrabandë në autobusin e tij.

Ai doli përballë togave të zeza për akuzën e mosdeklarimit në kufi të parave dhe sendeve me vlerë, por dhe si i dyshuar për pastrim të produkteve të veprës penale.

Pretendimet e Çelës janë se paratë vijnë si rezultat i kursimeve familjare, por mbetet enigmë fakti se përse paratë gjendeshin në autobus.

Gjykatësi Paulin Çera vendosi ta lërë në burg deri në përfundim të hetimeve, ndërsa la të lirë dy ndihmësit e tij.

Avokati i Çelës, Gramoz Lika tha se ky vendim do të ankimohet në Gjykatën e Apelit.

“Vendimi është objekt ankimi në Gjykatën e Apelit. Po i sillte nga Italia, i ka fitimet e 27 viteve, ka biznes atje, ka punë të ndryshme atje.

Çela u arrestua pasi gjatë kontrollit në autobusin e tij, që vinte nga Bari, u gjetën të fshehura në 6 qese plastmasi me paratë.

Raste të ngjashme në Portin e Durrësit ka pasur edhe më parë, ku përmes linjave të transportit, individë ose grupe kriminale sjelin para të pista duke paguar edhe një përqindje për futjen e tyre në Shqipëri.

LEXONI GJITHASHTU

• Burg për Elidon Çelën, u kap me 522 mijë euro të padeklaruara në autobus
• U kap me 522 mijë €, pronari i autobusit: Paratë janë kursime të familjes
• Të fshehura në 6 qese plastmasi, si u sekuestruan 500,000 eurot në Portin e Durrësit