55% e punonjësve të deklaruar në sektorin e ndërtimit me paga deri në 50 mijë lekë

Pagat në sektorin e ndërtimit vijojnë të mbeten të përqendruara kryesisht në fashat e ulëta dhe të mesme. Të dhënat e fundit të tatimeve tregojnë se rreth 25% e punonjësve në ndërtim paguhen me paga mujore bruto nga 40 mijë deri në 50 mijë leke.

Në total, sektori i ndërtimit numëron 65 000 punonjës të deklaruar, ku shpërndarja e pagave tregon një prirje të qartë drejt niveleve relativisht të ulëta të kompensimit. Përveç fashës 40–50 mijë lekë, 18% e punonjësve rezultojnë të deklaruar me pagë fikse 40 mijë lekë, ndërsa 12% marrin paga nën 40 mijë lekë. Kjo do të thotë se mbi gjysmën e punonjësve në ndërtim paguhen me paga deri në 50 mijë lekë në muaj, një nivel që mbetet modest krahasuar me intensitetin e punës dhe rrezikun fizik që karakterizon këtë sektor.

Në fashat mbi 50 mijë lekë, pesha e punonjësve nis të bjerë. 22% paguhen nga 50 mijë deri në 70 mijë lekë, ndërsa 12% nga 70 mijë deri në 100 mijë lekë. Vetëm 10% e punonjësve në ndërtim përfitojnë paga mbi 100 mijë lekë, ku 3% janë në fashën 100–120 mijë lekë dhe 7% mbi 120 mijë lekë. Këto shifra tregojnë se pagat e larta mbeten të përqendruara në një pjesë relativisht të vogël të fuqisë punëtore, kryesisht në role të specializuara, teknike ose drejtuese.

Dominimi i pagave të ulëta lidhet ngushtë edhe me strukturën e aktiviteteve brenda sektorit. Rreth 40% e punonjësve janë të angazhuar në ndërtimin e ndërtesave rezidenciale dhe jo-rezidenciale, ndërsa një pjesë e konsiderueshme punon në punime të specializuara ndërtimi, instalime elektrike, hidraulike dhe punime përfundimtare. Këto aktivitete, shpesh shoqërohen me paga të deklaruara minimale ose pranë kufirit të pagës minimale, sidomos për punëtorët jo të kualifikuar ose sezonalë.