6 të vdekur pas incidenteve në ndeshjen e Kupës së Afrikës

Të paktën gjashtë persona kanë vdekur dhe dhjetëra tjerë janë plagosur si pasojë e shtypjes jashtë stadiumit të kryeqytetit të Kamerunit pak para se të niste ndeshja e futbollit për Kupën e Kombeve Afrikane.

Sipas televizionit shtetëror, ngjarja ndodhur më 24 janar në hyrje të Stadiumit Olembe, në kryeqytetin Jaundi, teksa turma ka tentuar të hyjë për të ndjekur ndeshjen mes ekipit kombëtar të Kamerunit dhe atij të Komoreve.

Transmetuesi kombëtar ka thënë se autoritetet dhe Konfederata e Futbollit Afrikan janë duke hetuar situatën dhe po tentojnë të kuptojnë më shumë hollësi.

“Federata Afrikane e Futbollit është në dijeni për incidentin e ndodhur në stadiumin ‘Olembe’ gjatë ndeshjes së vlefshme për Kupën e Afrikës mes Kamerunit dhe Komoreve, teksa jemi duke hetuar situatën e duke marrë sa më shumë detaje mbi atë që ka ndodhur. Jemi në komunikim konstant me qeverinë e Kamerunit dhe komitetin vendor organizativ”, thuhet në një komunikatë për shtyp.

Turneu i futbollit për Kupën e Afrikës ka nisur më 9 janar.

Pas interesimit të vogël në ndeshjet e para, autoritetet e Kamerunit kanë marrë masa për të nxitur shikuesit, duke hapur dyert e stadiumeve, duke ofruar transport të lirë, ashtu sikurse bileta falas.