60 vite mban agjërim, Sherif Hysa nga Librazhdi tregon historinë e tij

Ky është Sherif Hysa, praktikant i devotshëm i besimit mysliman, i cili ka më shumë se 60 vjet që agjëron gjatë muajit të Ramazanit.

74-vjeçari nga fshati Kokrevë i Librazhdit, tregon se mbajtja e Ramazanit i sjell atij qetësi shpirtërore. Ndërsa thekson se as diktatura nuk e ka ndaluar familjen e tij dhe të gjithë fshatin të praktikonin besimin ndonëse duhej të ruheshin.

“Që ne moshën 10 vjeç unë kam filluar të agjëroj intervalisht si moshat e vogla, jo i rregullt me vonë sistemi i mbylli kishat e xhamitë, por moshat e vjetra kanë qenë mysliman të vërtetë dhe ai që ka qene i vërtetë nuk e ka lënë. Me dritare mbyllur, me perde dhe batanije, pa dritë kanë ngrënë syfyrin në errësirë dhe e kanë mbajt. Ramazani është mbrojtësi kryesor i myslimanit”, tregon i moshuari.

Ky muaj sipas Sherifit është jo vetëm muaji  sakrificës, por dhe mëshirës, mirësisë e begatisë. Ai tregon ndryshimet ndër vite për kushtet në të cilat ka agjëruar.

“Thuhet që e lusim Zotin të na zërë muaji i Ramazanit, jo ta diskutosh ti do agjërosh a s’do agjërosh. Ai muaji ty të ka pastruar komplet dhe ti je i zhveshur nga gjynahet, nga ngarkesa, se nuk ka njeri vetëm. Zoti është i pagabueshëm. Njeriu është i gabueshëm, por kur kërkon falje Zoti të fal. Në ato kohëra ishte edhe fukarallëk, tani ti çfarë nuk ke të hash syfyr, iftar, kushtet janë shumë moderne me atë kohë që ishim. Ne na kënaq këtu ne taravi, në darkë e gjithë rinia vjen në xhami”, thotë ai.

Pas këtij muaji sakrifice, Sherifi do të festojë Fitër Bajramin, me shpresën se Zoti do t’ia ketë pranuar përkushtimin e tij, ashtu siç dëshirojnë qindra milionë besimtarë në të gjithë botën.

LEXONI GJITHASHTU:

• Izraeli do të vendosë kufizime në kompleksin e Xhamisë Al-Aksa gjatë Ramazanit
• Nis muaji i shenjtë i Ramazanit, besimtarët myslimanë fillojnë agjërimin