9 vende të BE-së nënshkruajnë dokumentin e përbashkët për emigracionin

Nëntë vende të BE-së kanë nënshkruar një letër ku kërkojnë që Konventa Evropiane për të Drejtat e Njeriut të riinterpretohet për të lejuar ndryshimin e politikave mbi emigracionin.

Dokumenti është pjesë e një përpjekjeje të udhëhequr nga Italia dhe Danimarka dhe është nënshkruar gjithashtu nga liderët e Austrisë, Belgjikës, Çekisë, Polonisë dhe 3 vendet baltike.

Firmëtarët, që janë të mendimit se dëbimi i emigrantëve që kryejnë krime duhet të jetë më i lehtë, kanë nënvizuar se interpretimi i konventës duhet të rishikohet.

“Është me rëndësi të shqyrtohet nëse gjykatat e kanë ekzagjeruar efektin e konventës përtej synimeve origjinale të saj, duke alternuar balancën e mbrojtjes”, thuhet në dokument.

Nënshkruesit janë shprehur të bindur se, interpretimi i gjykatave në disa raste ka kufizuar kapacitetet e qeverive për të marrë vendime politike në shërbim të demokracisë.

Mesazhi i liderëve të 9 vendeve vjen në një kohë kur partitë anti-emigracion në Evropë kanë rritur popullaritetin e tyre.

Gjatë një konference për shtyp me homologen daneze Mette Frederiksen, kryeministrja italiane Giorgia Meloni tha se letra synon të hapë një debat politik mbi disa nga konventat evropiane dhe kapacitetet e tyre për t’u përballur me sfidat e ditëve të sotme, duke filluar pikërisht me emigracionin.

Gjithashtu, në letër, Meloni, Frederiksen dhe bashkëfirmëtarët e tjerë kanë paraqitur disa ndryshime konkrete që do të dëshironin të bëheshin realitet.