Rritja e çmimit të karburanteve, nafta 20 lekë më shtrenjtë, gazi dyfish

Çmimi i gazit për litër brenda një viti është dyfishuar. Në fillim të vitit 2021, gazi ishte nga 50-60 lekë për litër, por nga një vëzhgim në pikat e karburanteve rezulton se çmimi është rritur deri në 90 lekë për litër.

Edhe nafta është shtrenjtuar sërish me 10 deri në 20 lekë për litër, duke ndikuar drejtpërdrejtë tek drejtuesit e makinave.

“Ka ndikuar kaq shumë sa, nuk është në dorën tonë, ne vetëm jemi konsumator,” – shprehet një qytetar.

“Shumë keq, po u rrit nafta, rritet çdo gjë. Atë naftë prapë kemi, mbi kë do bjerë kjo, mbi njerëzit bie,” – thotë një tjetër.

“Gazin 48 e kemi marrë në këtë periudhë, tani me 67,” – llogarit një qytetar tjetër.

Eksperti i ekonomisë, Fatos Çoçoli e cilëson abuzive rritjen e vazhdueshme të karburanteve në vend. Ai tha për Euronews Albania se “sa herë që çmimi ndërkombëtar rritet, importuesit e naftës e risin çmimin”.

Çoçoli kujton se ligji i detyron kompanitë të kenë tre muaj rezerva karburanti, por në një kohë kur çmimet ndërkombëtare kanë luhatur periudhën e fundit, çmimet në tregun vendas nuk mund të luhateshin kaq shpejt.

Konfederata e Industrive të Shqipërisë këtë të dielë i bëri thirrje institucioneve të ndërhyjnë sa më parë për të zbutur pasojat e rritjes së çmimit të karburanteve, pasi sipas tyre kjo rritje rrezikon të marrë përmasat e një krize energjetike në vitin 2021-2022.