Greqia përfshihet nga moti i keq, përmbytje rrugësh dhe banesash

Reshjet e dendura të shiut kanë shkaktuar përmbytje në shumë rrugë të qyteteve greke përfshirë Athinën dhe Selanikun.

Probleme ka patur në qarkullimin rrugor, metrotë por edhe me ndërprerjen e energjisë elektrike.

Në Selanik autoritetet kanë patur një numër të lartë të kërkesave për ndihmë.

Për shkak të motit të keq shkollat në Atikë, Evia, Korfuz do të qëndrojnë të mbyllura edhe gjatë ditës së sotme.

Sipas parashikimeve reshjet e dendura  dhe stuhitë  do të mbulojnë gjatë të premtes më shumë zona të shtetit fqinj.

“Nuk ka asnjë dyshim që jemi duke u përballur me një fenomen të rrezikshëm të motit vecanërisht në disa pjesë të vendit, ndonëse po preket i gjithë shteti. Kemi përpara dy ditë të vështira,” deklaroi ministri për Krizën Klimatike dhe Mbrojtjen Civile, Christos Stylianidis.

Një autobus me pasagjerë mbeti i bllokuar dhe filloi të zhytej në ujë ditën e djeshme, njerëzit ndihmonin njëri-tjetrin për të dalë nga uji.

Ministria e Mbrojtjes Civile filloi të hartojë një plan për evakuimin e banorëve në zonat me një rrezik të lartë përmbytjesh.

Evakuimet do të jenë selektive dhe kryesisht të njerëzve që janë të moshuar ose kanë probleme që pengojnë lëvizshmërinë e tyre në rast përmbytjesh. Ato do të vendosen në hotele, qendra komunitare dhe hapësira të tjera të siguruara nga autoritetet lokale për një ose dy ditë, derisa moti të përmirësohet.