Arrihet marrëveshja për qeverinë e re në Gjermani

Lideri i Partisë Social-Demokrate të Gjermanisë dhe ata të dy partive të vogla, të Gjelbrit dhe Demokratët e Lirë, do t’u rekomandojnë bazave të partive që të avancojnë drejt formimit të koalicionit qeverisës.

Lajmin e komunikoi ditën e premte për mediat vetë kryetari i SPD-së, njëkohësisht kandidat për kancelar të Gjermanisë, Olaf Scholz.

“Ne kemi rënë dakord për linjat kyçe që do të shërbejnë si baza për vendimet e partive dhe në këndvështrimin tim personal, rezultati është shumë pozitiv. Ai tregon hapur se ne mund të formojmë një qeveri që dëshiron të sjellë progresin. Një progres që është i mundur dhe i nevojshëm në shumë fusha të zhvillimit social, ekonomik dhe në lidhje me detyrat që kemi si vend i Evropës”, tha Olaf Scholz.

Social-demokratët, që dolën të parët në zgjedhjet e muajit të kaluar, të Gjelbrit dhe liberalët e Demokratëve të Lirë kanë zhvilluar prej kohësh bisedime për të zbuluar nëse kishin gjëra të përbashkëta për të formuar së bashku qeverinë.