35 milionë euro energji në tetor, fondi i qeverisë për OSHEE po harxhohet shpejt

OSHEE ka shpenzuar 35 mln euro vetëm në tetor për blerje energjie. Kjo shumë është sa një e treta e asaj që qeveria ka premtuar të japë si garanci sovrane deri në fund të vitit. Me çmimin aktual, 100 mln euro mund të shpenzohen pa u mbyllur nëntori.

Niveli i ujit në liqenin e Fierzës ka rënë në minimum historik, ndërsa prurjet e janë vetëm 65 metër kub në sekondë. Edhe dy HEC-et e tjerë në kaskadën e Drinit janë në krizë prodhimi për energji.

Me këto kapacitete, Shqipëria ka nevojë të blejë sasi të mëdha energjie, por çmimet në bursë janë rritur përtej parashikimeve, duke u 5-fishuar, në krahasim me vitin e kaluar.

Këtë të hënë, në bursën e Hungarisë një megavat/orë u shit për 249 euro, ndërsa në orare piku çmimi arriti 325 euro. Me këto çmime janë mbyllur edhe ankandet e OSHEE, i cili ka shpenzuar 34.7 milionë euro vetëm për tetorin.

Ky i fundit hapi këtë të premte një tjetër procedurë për të blerë energji për 1 javë. Në fazën e parë të procedurës u kërkuan 75 600 Mwh energji, por OSHEE siguroi 65 % të sasisë së kërkuar me një vlerë prej 14 milionë euro ku çmimi mesatar rezultoi 266 dhe 318 euro megavat/orë.

Qeveria ka dalë garant që të japë për OSHEE deri në fund të këtij viti 100 mln euro, por me ritmet aktuale të çmimeve në bursa dhe me disavantazhin e prodhimit vendas, ky fond mund të mbarojë më herët, pasi më shumë se 1/3 e tij është shpenzuar ende pa u mbyllur tetori.