SHBA njofton armëpushim të ri mes Izraelit dhe Libanit, kusht ndalimi i sulmeve të Hezbollahut

Izraeli dhe Libani kanë rënë dakord për zbatimin e një armëpushimi të ri, i cili kushtëzohet nga ndalimi i plotë i sulmeve të Hezbollahut, njoftoi Departamenti Amerikan i Shtetit.

Marrëveshja u arrit pas raundit të katërt të bisedimeve të ndërmjetësuara nga SHBA në Uashington dhe parashikon largimin e të gjithë operativëve të Hezbollahut nga zona midis lumit Litani dhe kufirit me Izraelin, si dhe forcimin e kontrollit të territorit nga Forcat e Armatosura Libaneze.

Në deklaratë theksohet se e ardhmja e marrëdhënieve mes Izraelit dhe Libanit duhet të përcaktohet nga dy qeveritë sovrane, duke refuzuar ndërhyrjen e aktorëve të tjerë shtetërorë ose joshtetërorë.

Marrëveshja vjen pas një armëpushimi të pjesshëm të arritur më herët këtë javë, sipas të cilit Izraeli u zotua të mos kryejë sulme të gjera në Bejrut, ndërsa Hezbollahu do të shmangte sulmet ndaj Izraelit.

Megjithatë, situata në terren mbetet e tensionuar. Të paktën nëntë persona u vranë në sulmet izraelite në Libanin jugor të mërkurën, ndërsa Hezbollahu lëshoi raketa drejt Izraelit verior.

Sekretari amerikan i Shtetit, Marco Rubio, deklaroi se qëllimi i bisedimeve është krijimi i një plani sigurie në Liban të pavarur nga Hezbollahu.

Palët pritet të takohen sërish më 22 qershor për të vijuar negociatat me synimin e arritjes së një marrëveshjeje gjithëpërfshirëse. Deri tani, Hezbollahu nuk ka reaguar zyrtarisht ndaj marrëveshjes së re.