Nuk rritet çmimi i biletave të autobusit në Kosovë

Në Kosovë nuk do të ketë rritje të çmimit të biletave për autobusët qytetës dhe ndërqytetës.

Këtë e konfirmon për Euronews Albania kryetari i Shoqatës se Transportit Rrugor të Udhëtareve, Ruzhdi Kurtishaj, i cili thekson se ngritja e çmimit në disa linja është vendim individual i kompanisë.

“Shoqata as që ka marrë ndonjë vendim sa i përket çështjes së ngritjes së çmimeve. Janë disa kompani që në mënyrë individuale kanë rritur çmimin e biletës”, tha Ruzhdi Kurtishaj.

Kompanitë që kanë rritur çmimin me 50 cent nuk pranojnë të flasin para kamerave, por tregojnë se kjo ka ardhur si pasojë e përgjysmimit të udhëtarëve.

Ndërsa, Kurtishaj shton se edhe pse shoqata nuk ka një vendim për çmimet, rritja e tyre nga disa kompani, por edhe rritja e çmimit të biletave në vende të tjera është e arsyeshme.

“Sigurisht që ka arsye të plotë për t’u rritur çmimi edhe në sektorin e transportit ndërkombëtar për shkak të rritjes së çmimit të naftës, të furnizimit me goma e pjesë rezerve dhe si edhe rënia e kapacitetit të udhëtarëve”, u shpreh z. Kurtishaj.

Kurtishaj tha ndikim për uljen e numrit të udhëtarëve nga Kosova në Shqipëri dhe anasjelltas kanë ndikuar vendimet e dy qeverive që të mos lejohet udhëtimi pa certifikatë vaksinimi, apo test.