Stuhi në Gjermani, era shkul pemët, kaos në sektorin e transportit publik

Një stuhi, me shira dhe erëra të forta, shkaktoi të enjten dëme dhe probleme në sektorin e transportit në Gjermani.

Shërbimi meteorologjik vendas paralajmëroi qytetarët për rrezikun që vjen nga stuhia e pagëzuar me emrin “Ignatz”, e cila pritet të përshkojë zona të tjera të Gjermanisë.

Sipas meteorologëve, gjatë së enjtes erërat kanë fryrë me 100 kilometra në orë.

Moti i keq shkaktoi vonesa dhe anulime të udhëtimeve në vend, me operatorët hekurudhorë që njoftuan oraret e ndryshuara në faqet e tyre të internetit, ose në ekranet reklamuese të e stacioneve të trenit.

Si pasojë e erërave të forta, shumë pemë u çrrënjosën dhe gjatë rrëzimit dëmtuan banesa dhe shkaktuan probleme në trafik.

Në Berlin, dy pemë u rrëzuan në një bllok apartamentesh, duke detyruar departamentin e zjarrfikësve të angazhohet për heqjen e tyre nga ndërtesat.

Autoritetet vendore kanë deklaruar se operacionet e pastrimit do të vijojnë, pasi pemët kanë lënë gjethe të shumta nëpër rrugë dhe duke qenë se erërat vazhdojnë, ato mund të përbëjnë problem në qarkullimin e automjeteve.

Në Mynih, ndërkohë, zjarrfikësve iu desh të siguronin qëndrimin e një skele të madhe ndërtimi, e cila ishte përmbysur për shkak të stuhisë.

Zyrtarët lokalë deklaruan se moti i keq mund të shkaktojë rrëzime të mëtejshme të pemëve dhe u bënë thirrje qytetarëve që të shmangin lëvizjet.

Meteorologët parashikojnë që stuhia të zhvendoset në orët e ardhshme nga perëndimi në lindje të vendit.